Os mai chi sy'n berchen ar y cyfrif
Dim ond perchennog sy'n gallu dileu cyfrif busnes, ac mae hynny'n cael ei wneud ar wefan CaterPad. All yr ap ffôn ddim gwneud hyn.
- Mewngofnodwch yn caterpad.app mewn porwr gwe, ar gyfrifiadur, tabled neu ffôn.
- Agorwch Mwy, yna Bilio.
- O dan Canslo, ticiwch y blwch sy'n dweud "Rwy'n deall y bydd y cyfrif yn ddarllen yn unig am 90 diwrnod ac yna'n cael ei ddileu."
- Pwyswch Canslo fy nghyfrif.
Wedyn, mae'r cyfrif yn ddarllen yn unig am 90 diwrnod. Gall pawb ar y cyfrif ddal i fewngofnodi a'i ddarllen, a gallwch allforio popeth, ond does dim byd newydd yn gallu cael ei ychwanegu. Dydy eich cynllun ddim yn cael ei adnewyddu, ac os ydych chi'n dal ar eich cyfnod prawf, mae'n dod i ben yn syth heb dâl. Gallwch newid eich meddwl ac ailagor y cyfrif o'r un dudalen unrhyw bryd yn y 90 diwrnod hynny.
Rydyn ni'n anfon e-bost at bob perchennog 60 ac 80 diwrnod ar ôl i chi ganslo, gyda dolen sy'n lawrlwytho popeth ar unwaith, y cofnodion a'r ffeiliau gyda'i gilydd. Pan fydd y 90 diwrnod ar ben, mae'r cyfrif yn cael ei ddileu dros nos, a does dim modd ei gael yn ôl.
Beth sy'n cael ei ddileu
Popeth mae'r busnes yn ei gadw yn CaterPad: pob gwiriad, tymheredd, danfoniad, cofnod glanhau a chofnod alergenau, pob dogfen, llun a ffeil a uwchlwythwyd, y rhestr staff gyda'i chofnodion hyfforddiant a ffitrwydd i weithio, a hanes y cyfrif ei hun o bwy wnaeth beth. Mae mynediad pob person i'r cyfrif yn mynd hefyd, a'u manylion mewngofnodi, oni bai eu bod yn dal i'w defnyddio ar gyfer busnes arall ar CaterPad.
Beth sy'n cael ei gadw, ac am ba hyd
- Un llinell yn dweud bod y cyfrif yn bodoli ac wedi'i ddileu: ei gynllun a'r dyddiadau y cafodd ei agor, ei ganslo a'i ddileu, heb enw, rhif na chyfeiriad y busnes. Rydyn ni'n ei chadw am byth, fel prawf bod y dileu wedi digwydd.
- Cofnodion bilio: beth a godwyd a phryd. Mae ein darparwr taliadau yn cadw'r anfonebau a'r taliadau a drafododd, ac rydyn ni'n cadw'r hysbysiadau talu a anfonodd aton ni. Mae'r ddau yn cael eu cadw cyhyd ag y mae rheolau cyfrifyddu yn ei ofyn. Dydy manylion cardiau byth yn ein cyrraedd ni.
- Ein log ein hunain o'r camau cymorth a gymerwyd gennym ar y cyfrif, gan gynnwys y dileu ei hun, er mwyn i ni allu dangos beth a wnaed a phryd. Mae'n cael ei gadw am byth.
Os ydych chi'n gweithio i fusnes sy'n defnyddio CaterPad
Y busnes rydych chi'n gweithio iddo sy'n penderfynu beth mae CaterPad yn ei gadw amdanoch chi, gan mai nhw piau'r cofnodion, felly gofynnwch i'r perchennog neu reolwr. Gallan nhw eich atal ar dudalen Staff, sy'n eich allgofnodi ym mhobman ac yn eich rhwystro rhag mewngofnodi.
Mae cofnodion y gwnaethoch chi eu llofnodi yn aros yng nghofnodion y busnes gyda'ch enw arnyn nhw, oherwydd mai nhw yw ei dystiolaeth diogelwch bwyd. Maen nhw'n cael eu dileu pan fydd cyfrif y busnes yn cael ei ddileu. Os nad ydych chi'n siŵr pwy i'w holi, neu os nad oes neb yn ateb, anfonwch e-bost aton ni a byddwn ni'n helpu.
Tynnu'r ap ffôn
Dydy dadosod ap CaterPad ddim yn dileu eich cyfrif nac unrhyw beth sydd wedi'i gadw'n barod. Mae unrhyw beth nad yw'r ap wedi'i anfon eto yn cael ei golli gydag ef, felly gadewch iddo orffen anfon yn gyntaf.
Cwestiynau
Anfonwch e-bost aton ni am unrhyw beth ar y dudalen yma, neu am ddata nad yw'n ei gynnwys.